لاتحزن

‎يالله ياللي ماعبدنا سواكا

يافارج هم ٍعلى القلب مصتك

يامستجيب برحمتك من دعاكا

يامن فتحت الباب دايم لدعوتك

ترحم كسيرٍ ما لغيرك تشاكا

ميمم ٍوجه الرضا صوب قبلتك

من جور دنياٍ بالمياسم تراكا

على فواد فيه الأهوال تلتك

ياملهمي وش بالعيون ْتباكا

وليه العيون تبيح مكنون دمعتك

لو إنها سود الليالي تحاكى

جابت لك علوم من أعوام ماجتك

اللي لها بين المحاني عراكا

مثل الحديد اللي على بعضه إحتك

كنه عقد للروح حبل وشراكا

مأسورة ٍ ماهي من الهم تفتك

لا ينهدم عزمك ولو هو تواكا

على عصا العزه تسنّد  بهمتك

لا طحت لا تحزن وربي معاكا

الله كفيل يفرج  اليوم كربتك

ولاتخذل اللي من زمنْه انتخاكا

واليا عطيت إحذر ترى الموت منتك

مد بيمين العون  رجلٍ نصاكا

الطيب كنز ترتفع به مهابتك

ويالله طالبْتك وثيقة عراكا

يا منقذ ذالنون بلطفك وحكمتك

#شواهق_نجد