كويت الخير يا داري

سجيت أنا بنظراتي وراح الفكر يرجيها‍
وصلت لهمسه وبسمه تنشدني عن أخباري

تقول أم العيال أدري خذت عقلك وتبغيها‍
أبي توصفها علمني أبدعي ربّي الباري

أقول بوصفي لو بوصف أقصر ما أوفيها‍
وأبي منك تخلـيني أسامرها ولا تغاري

وأبي أوصف لك أحوالي إليامن جاني طاريها‍
أهيم وتوصل النظره بعيد ولاني بداري

وأبي أوصف لك إشعوري تجاه اللي أسميها‍
حبيبة روحي وقلبي عجزت أكفيها بأشعاري

وأبي أوصف لك الفرحه إليا ضمتني إيديها‍
أطير من الفرح كنـّي طفل يلعب ولا يداري

وأبي أوصف لك الدنيا إذا غابت حراويها‍
تظلـّم فيني الدنيا وأتوه بزحمة أفكاري

وأبي أشرح سبب سجّت عيوني وانتي حليها‍
وصل عيد الحبيبه وانتهت من صدري أعذاري

أبهديها ولا أقدر أقصر باللي بهديها‍
أبي شورك وعلميني خجلت وذبلت أزهاري

وصدت عنّي البسمه وراحت تبكي ماضيها‍
تقول شلون يا خاين بشينك صاير إتماري

وفوق الشين قوة عينك تبي منّي أهنيها‍
ألا لو تعرفين اللي أغازلها بإجهاري

كنتي بجد فزعتي للهدايا وجيتي ترضيها‍
أبسطر لك إسم عشقي وأطفي بقلبك الناري

بداية إسمها كاف ٍ كفانا شر غازيها‍
وشفنا من غزاها منكسر بالجحر منهاري

وحرف الواو ويل اللي يفكر يوم يسبيها‍
تزودنا دروس الوقت من عزم ٍ واصراري

وحرف الياء ياعيني على طيب ٍ يعليها‍
تمد اليمنى واليسرى بخير ٍ والكرم جاري

وحرف التاء تشبه في حلاياها ومواريها‍
هنوف ٍ جادل ٍ تزهى بحلاها تلفت أنظاري

كويت وللكويت الحق نعايدها في عيديها‍
يشارك بالفرح من وقفوا وقفات الأحراري

نطفي شمعها وندعي من الله دوم يحميها‍
وهذا حال من ياطا ثراها صغار وكباري

في ظلّ الحاكم الوافي عسانا بجد نوفيها‍
أبو ناصر سلايل من كسب هيبه ومقداري

ألا يا شيخنا بأمرك تروح أرواحنا فيها‍
تروح إفدى ثرى مجد ٍ عسى توفيه الأشباري

ألا يا شيخنا ترخص لك الدنيا ورواسيها‍
ونلبس لك كفن عز ٍ يعزك بين الأقطاري

ياخو مريم عجزت احصي غلا شاطي بشواطيها‍
يا كيف إحصي غلا مزن ٍ يهل الخير مدراري

ولو بحصي مدى حبي لثراها كيف بحصيها‍
أوقف عند تاريخ الكويت وأبدا مشواري

وبفتح صفحة الجهرا ومن أطرافه أثنيها‍
في يوم ٍ جيش شمـّر قاده الضاري وهو ضاري

أخو صلفه وقف وقفة حرار وصد ناويها‍
وقف جنب ٍ إلى جنب الكويت وجيشه الساري

ونشدت القصر الأحمر عن مواقف دوم يطريها‍
ذكرلي شويما وعبيـّان أصايل تتعب الشاري

ذكر مرزوق بن متعب بذكرى دوم يحكيها‍
وذكرلي من الطواله فارس ٍ ماهاب الأخطاري

هذاك الشمري مرشد فدا الجهرا واهاليها‍
شجاع ٍ والقصر لحمر شهد له قاد الأقداري

كويت ولك توارثنا الغلا والدار نفديها‍
كويت ومسكنك عيني وغزلنا دوم سماري

كويت وسامحيني ياغرام وعشق مغليها‍
كويت وياكويت العز كويت الخير ياداري

نافع بن طواله