إييه أنا ..

إيه أنا من هو نسيته مع طول السنين

شف سكاتي إنكسر من درى بإنك حضرت

ويا وجودي وجد حالي من الجرح الدفين

من فعايل حضرتك لا رحمت ولا عذرت

مرحبا بك حي شوفك عسى يومك يزين

اسمع الخافق يرحب ويهلل من ظهرت

ودنا شوي نتحاسب وما يخفى يبين

بس ودي في ردودك تطلع ما حفرت

واذكر أيامي معك يوم كنا جاهلين

بالمحبة نكتسي وبالعرب كني ظفرت

وأذكر إنا بالفرح يوم شبكنا اليدين

انتفاخر بالهوى ولجل عينك ما أعتبرت

والعرب تدري بنا من تشوف البسمتين

وإن دعوني ما تركتك ولجلك ما أفتكرت

أعتبرنا من كبار الشيوخ الثايرين

ياخذون الراي منا عن اللعبة وكرت !

ويوم قالوا لي لرفيقك تعنوا خاطبين

احتوتني حالةٍ شلت القلب وذعرت

قمت أردد عندهم يا عساهم مبارَكين

والله العالم بحالي وكني انفطرت

العمر ما هو يقيس المحبة والحنين

والوفى قال الفعل ذا أنا منْه انتحرت !

يا عسى إنك قد تذكرتني عقب السنين

من بقايا طعنتك .. هاه يوسف .. ما ذكرت ؟!