ذقت الامرين

مجاراة العنود العلي و شواهق نجد

قولوا لها مهما جرحتي: تمونين
اختٍ عزيزه و فالسما الجو صافي

و حكيٍ تقولينه بليّا مثامين
مثل التراب اللي ذَرَتْه السوافي

أنا فخر لسعود وعناد وحسين
اخت الرجال و بنت حر و سنافي

درّة بحر متربيه تربية دين
محروسةٍ والطيب ساكن ضفافي

يا بنت ما يحتاج شرح و قوانين
العز ضافي وايضاً الستر ضافي

من طيب راس آبوي ترجح موازين
ومن طيب فِكري ينسج الشعر قافي

وانْ زادني شعري محبة ملايين
و الله و قسم بالله ما أقول كافي

،،،،،،،،،،،،،،،،،،،،،،،،،،،،،،،،،،،،،،،،،،،،،، 

قولي لها نصبر على المر والشين
ونوفي مادام الدهر ماهو بوافي

ونصبر ولو جار الزمن والقريبين
ومهما يصير نقول خير وعوافي

ياغاليه والجرح يندى من البين
ولا لقيت لحزن قلبي مرافي

هذي حياتي كلها قاب قوسين
واللي خفى ماعاده اليوم خافي

من حيرتي تاهت جميع العنواين
ومكاننا ذرّت عليه السوافي

استوحشتني الدار من عقب عامين
عيني عليها وازرق الدمع صافي

وين العنود تشوف نزف الشرايين
وتضم كفي لا بدا بارتجافي

ضاق الفضا بي لين ذقت الامرين
وآقول كافي قال ماهو بكافي

هذا وانا بنت القروم السلاطين
اهديك جزل الحرف واصوغ قافي

صح الله لسانك من المملكه لين
ساحل عمان وتاصل لكل وافي

جاريت حرفك وانهمر لي بنهرين
شربت عذب حكاك وهذي ضفافي

باسقيك جزلي لين يالورد تروين
البلسم اللي للمحبين شافي 

#شواهق_نجد