قصيده من الأرشيف

طالبك  يالله  مجيب السائلين

رحمتك  .. ورضاك  في يـومٍ  يهـول

يومٍ يشـيّـب عيون الناظرين

وفيه كل الناس في  .. حالة ذهـــــــول

ومن عظم مافيه ياربي تعين

تشخص الأبصار.. وتحيـر العـقــــول

يالله اجعلنا  بعفوك فايزين

وضمن من يارد على حوض الرسول

والحياه اوهام ياللي غافلين

والـزمن دوار..والدنيا خــتــــــــول

وكل نفس اتموت لوعاشت سنين

         وكل ملكٍ غير ملكـ الله يزول

وكل فصل وينتهي والواهمين

يحسبون ان ( الربيع )  أربع افصول

والشقي من غره ابليس اللعين

     وبالمعاصي دايم  يصول ويجول

ضاع عمره في دروب الجاهلين

         ودايم الأعمار تقصر ماتطول

لين مات ولاترك علم ثمين

    ولا عمل صالح..ولا اشداد وذلول

والحظيظ اللي جمع بين الثنين

    يـوم غيره  في صعود وفي نزول

ومن كبر حظه جمع دنيا ودين

          وعند ربه  والاوادم  له قبول

ولو يلين الصلب عزمه مايلين

             كنه بليهان  شيال الحمول

ان حضر يكحل عيون الحاسدين

    وان رحل وان غاب تكفيه الفعول

وياعسى اهل الطيب دايم سالمين

     حافظين  السلم الاول  والاصول

الرجال أهل الوفاء والطيبين

        من فداياهم  .. مفتشت العدول

وأهل النمات واللي منصتين

     لجلهم ..لو كان من باب الفضول

عـالـمٍ وقت الرخا متواجدين

  ولا لهم  ينشاف وقت الضيق زول

ومن يقصر في لزومه مرتين

        ما أعـتـقـد  للثالثه عنده حلول

ومن يجنب عن سلوم الاولين

   لايواصلني ولا أبـغـى له وصول

ياجد أشباهه وانا جنبي متين

     ولا يعد من الرجال الا الزحول

شاعر ومن روس قومٍ غانمين

    صيتهم عالي رغم خشم العذول

وأنت ياللي لايسار ولا يمين

    والله اني فيك مدري ويش اقول .!

والنصيحه كان لك  قلبٍ فطين

      والجهل درب غدا فيه الجهول

بختصرها كلها في كلمتين

      ولكثير الهرج  ماعندي ميول

زين النيه  لك  الدنيا تزين

      وفي يد الرحمن مفتاح القفول

تمت  وقولوا  معي  يا سامعين

        ياصلاة الله على وجه الرسول