بعض الـهـقـاوي

غابت دواعي فرحتي والهناء غاب

    وحلت على جوي من الحزن غيمه

تجول بالخاطر مشاريه وعتاب

        والصمت خيم والمواقف أليمه

مافيه شي أصعب من الظن لاخاب

      بالصاحب اللي له مكانه وقيمه

صدمه وحيره في متاهات الاسباب

   معقول!  ماسوى الزمان بخصيمه
 

يا صاحبي حطيت بالفكر دولاب

      وشفيك ضيعت الوفاء والعزيمة

خيبت ظني فيك والظن كذاب

     يلعنك يا بعض الهقاوي غشيمة
 

راهنت فيك الوقت في فكر كساب

    قلت: النصر قال الزمان: الهزيمة
 

صحيح وقت وفيه ياقل الاصحاب

    ياهل الوفاء واهل السلوم القديمه

واليوم الا يا صاحبي خاطري طاب

      والحر ما يرضى الليالي تضيمه

من اولن منزلك في راس مرقاب

      واليوم عندي صار بعدك غنيمه

وانا رفيقي من نزيهين الأشناب

       ماهو من اللي ينقلون النميمه

والا أنت روح وبيننا قفل الباب

        قلته وانا كلي شهامة وشيمه