اغنيلك

يا شيخ ادخل على الله من متى والقلب يسعى لك
                        ولا انت اللي عرفت انه يبيك ولا روى ويلك
يجيني مثل موجٍ ينكسر عمره على جالك
                        إلين أصبح يعشق الموت في حضرة مداهيلك
يجيني مثل صبٍ علّم الدنيا وفى وصالك
                        إلين أصبح يغني للهبوب .. أعذب مواويلك
يجيني مثل طفلٍ دلّهوه اسمك .. ولا طالك
                       إلين أصبح نهارك ضحكته و بكاه في ليلك
شأقول أكثر من انه لا لمحك يقوم يبرالك
                       واقول إركد علامك .. لا تفطّن بك عواذيلك
ويسكت كنك اللي قلت له يا علّي .. فدالك
                       سكوت الخايف انك ما تحس انه يلبي .. لك
يسولف بك عليْ ولا سفهت الهرج .. غنالك
                       ولا أدري الا وانا واقف على حيلي و أغنيلك
تعب واتعب عروقه و ان عذلته قال عذالك
                       يا قلب النايفات ان سولفوا بك عدّلوا ميلك
تصدق .. قلت له جرب فراقه يمكن أشوى لك
                       على رجوى تصيب وتنتهي كذبة مواصيلك
وضحك .. وأطرق شوي .. و صد كنه يلمح ظلالك
                       وتلفّت لي وقال فراقك أهون .. قلت عزيلك
بعدها كل ما شرّع يدينه .. قمت لقبالك
                       مثل قاعٍ يجرحها الظما .. ترجى مخاييلك
على فالي .. ماغير أقول فال الله ولا فالك
                       لو ان الفال فالك .. والهيام أبسط محاصيلك
وربي كان هذا الكون قبلك .. مظلمٍ حالك
                       وبعدك صار هذا الكون .. ضوحٍ في قناديلك
لذا .. هالحين أببدى سيرتك وأطرب لموالك
                       مضى ليلك .. وليلي تو يبدأ في مضا ليلك
ابتعرف عليك بصدفةٍ ما جت على بالك
                       ولا بال الظروف اللي تعاونها بهاذيلك
وأبزهِّب شمال الصدر .. لجل يطيب منزالك
                       وأبتمناك في حلم الكرى .. وأصحى وأناديلك
أبستوعبك لين تمدلي برضاك فنجالك
                       وأبلوّعك لين أشوف فعل العشق في حيلك
ولا شفتك .. أبجلس كني أنشد عن أحوالك
                       وانا انشّد عن دموع الوله .. بعيون منديلك
اباصير أول آمالك .. واباصير آخر آمالك
                       اباصير الجهات الخمس .. وأطنش مراسيلك
اباخذ ثار قلبي يوم كان الظلم يحلالك
                       واذا غنالك أدري باترك الدنيا وأغنيلك