اجـي كـلـي

تضيق الدنيا لو تزعل حبيبي

.........................  وتموت اعذار ما توفي اعتذاري

ازعل لجلك الدنيا واغيبي

.........................  وافجرهم ولو قالوا انتحاري

ولا تزعل عليّ يا طيب طيبي

.........................  لأن رضاك همي لاحتضاري

الي من ضاق انا وش عاد ابيبي

.........................  اعاف الكون لأجله باختياري

واصيح بعزلتي واقنب قيبي

.........................  مثل ذيب (ن) قنب باقصى الصحاري

اجي خجلا يسابقني نحيبي

.........................  واقدم عذر يعلنه انكساري

واقول اسف ولو كل (ن) دريبي

.........................  مدام اني خطيت وذا شعاري

اجي كلي .. وكله يعتزيبي

.........................  وألملم نفسي لو زاد انتثاري

نخيته حب وايضا ينتخيبي

.........................  عطيته قلب عن غيره استداري

انا والله ما ادري وش نصيبي

.........................  معك يا زين حظي صار عاري

جمعت ورود يسقيها سريبي

.........................  وجيت بها وانا دمعي اداري

انا مرضا احد يزعل صحيبي

.........................  ولا ارضى الجرح لأخواني وجاري

اجل وشلون يزعل من رضيبي

.........................  وسكنت بداخله واصبح دياري

سريت بداخله عشق (ن) صعيبي

.........................  وسرى في داخلي مثل الشراري

انا ابدا به وحبه يبتديبي

.........................  من اجله صغت ابياتي جهاري

اذا هو عافني ما عاد ليبي

.........................  ابيع الدنيا لاجله باختصاري

احبه حب خلاني صويبي

.........................  وقلب ليلي وصار اعلى نهاري

وحبه في ضميري يلتويبي

.........................  اهو داري وانا والله داري

أحبه واعشقه وربي حسيبي

.........................  واموت بطلة (ن) تطفي انتظاري 

وادوخ بسمته واصبح عطيبي

.........................  واضيع بهمسته وانسى مساري 

ويلف الكون لمن جاء قريبي

.........................  يجي جنبي ويمناه بيساري

سحابة عشقنا تسقي شعيبي

.........................  وتروي جذورها وتثمر ثماري

عسى شمسه ابد لا ما تغيبي

.........................  ويبقى الحب فينا دوم ساري

وعساني ما افقده لأنه طبيبي

.........................  وعساني فدوة (ن) له يا عذاري