أعرف الحقايق

إلى من  بدالي مـا بدالي  و سقت القاف

               مانيب  أتخبّط  لـو  تخبّط  قصير  الـشوف

أصـبّ  المعاني  و أتنحّى  عن  الإسـفاف

               و لاني  بعاهات  العرب  يـا  عرب  مكلوف

ولا أمشي ورى من ينتكس حزّة الميقاف

               ولا أخذ برأي ضعيف  يآخذ  برأي ضعوف

غشيمٍ  حـدوه  عفون لـ مصادم  العرّاف

               و غنّا  على  مـا  يشتهي جـاحد  المعروف

مغفّل يظنّ  إن ما مضى بالذهانه  طـاف

               تذيهن  و  أنـا  عيني  تصدّد  تبيه  يـطـوف

غريرٍ  يشوف القاع  و أنـا على المشراف

               أشوفه ولا أجهل مـا فعل لو يسوق حلوف

أعرف  الحقايق و أذكر  الحقّ لـلإنصاف

               وأحفظ الوثايق لين يلعب على المكشوف

مانيب  أتبلّى و أكـره  الجور و الإجحاف

               أوقّف وإلى من جيت ما آتي و أنا مدفوف

أدلّ  المذابح و إن  بـدأ لازمي ما أخاف

               أسلّ  الصقيل  اللي  يبثّ  بعداي  الخوف

وعن قول ثارت في خباها و صار خلاف

               فلا  مفرح  الشمّات و مـجاوب  الملقوف

على العزّ  و الشيمه وما ورّث الأسلاف

               أبصبر ما دام  الصبر  للمحتسب مخلوف

               عبدالعزيز الرشيد