إلا واحد

:

:

يا الاهي طالبك ثم ارتجيك

كل من نزل دموعي تعاقبه

إلا واحد يا منجي ملتجيك

طالبك لا تعذبه وتحاسبه

غالين يسوى عيوني بلا شريك

ما حــد(ن) ياصل لحبــه قاطبه

يسألوني هو شريك لوالديـــك

قلت احبه واعشقه واموت به

ليت موتي سابقك لارحم ابيك

ولا ذبحت القلب بيدك صالبه

ولا نحرت بداخلي طفل(ن) يبيك

ينتظــر منك وعـــود(ن) كــاذبه

خنت قلبي يوم قلبي محتويك

الغدر صاحبك وانته صاحبه

انت لــوك قــايل(ن) لا ما ابيــك

دون غدر ودون ضيم(ن) شاربه

كان ما شق القهر صدري عليك

ولا بكيتــك في خشــوع الراهبه

ولا شهقتك حب مع هذي وذيك

ولا زفــرتك عشق نــاره لاهبه

ولا حشرت الصدر شوق(ن)يهتديك

ولا ضميــتك فـقــد فــــيني ساكبـــه

ولا شكيتك للورق الله يهديك

دامهـــا بيني وبينــك خــاربه

ما رحمة القلب يومه في يديك

الرجــاوي في حضورك خايبه

انت بايعني وانا كيف اشتريــك

شف جروحي من فعولك ناحبه

لا تجيني يا غــلاي ولا اجيــك

شف دموعي في عيوني رايبه

ما لك بجوفي عروق(ن) تشتهيك

دام حــبي من حـــياتك شـــاطبـه

حبك بصدري سحابه ترتويك

وحبي بصدره ضريحه ناصبه

المحبة ما تجي غصب(ن) عليك

لا هــو غاصبني ولاني غاصبـه

كل شي(ن) في حياتي يحتريك

حـبي وشعري وروحي الغاربه