احسبك مستقبلي واصبحت ماضيه

غيرتني ولا انا ماكان لي نيه
احب غيرك وادور فالهوى ثاني
 دايم مابين الحبايب فيه ماريه
زي الوعد تنحفظ مع مر الأزماني

صدمه بليا مواعد واثرت فيه
ياكيف بديتها وارخيت في شاني
توبتك عقب الخطأ ما تدمح السية
شمتّ بأحساسي القاصي مع الداني

لو تفتح القلب شفت بداخله كيه
جرحت قلبي واحسبك كنت ترعاني
واليوم روحتك صارت تشبه الجيه
غيرت قلبي و احاسيسي وعنواني

احسبك مستقبلي واصبحت ماضيه
ياصاحبي روح في شانك ولي شاني
انا بدرب المحبه كنت مبليه
ياجعل من خلفوك الخلد تنساني

دمع نثرته عشانك كل عصريه
عيا ينسيني اللي منك قد جاني
جرحي بقلبي حبيبي ماهو شويه
لو قلت ببكي طوال العمر ما اكفاني

بكره محبتك مع ذكراك منسيه
خسرتني من يدينك كيف  تلقاني
وغيرتني ولا انا ماكان لي نيه
احب غيرك وادور فالهوى ثاني
 

...#تمت