يا الله يا اللي من ترجاك ما خاب

.................... يا اللي عليه الناس تشكي بلاها

يا واحد(ن) فرد(ن) صمد ما له أرباب

.................... يا رافع (ن) فوق الثريا سماها

اشكي عليك اليوم والقلب منصاب

.................... صابه قدر مكتوب ما هو بعماها

غاب العضيد وكشرت كل الأنياب

.................... واليوم نفقد مع سندنا ذراها

قولته يا (أمي) غادرت مثل الأسراب

.................... غابت وغاب اللي عليه ملاها

يا ابوي يوم ان الرجاجيل اخشاب

.................... وانته كفلت المرجله في صباها

طيب وكرم متسربله وسط محراب

.................... شيخ(ن) تعلى فوق ذروة سناها

من رحمته دمعته في طرف الأهداب

.................... لشافني ابكي نثر كل ماها

يقول لي حبك على القلب غلاب

.................... انتي الغلى وكل الغلى يا غلاها

واليوم وينك يا غلا كل الأحباب

.................... ناديت : أبويه .. وارتجع لي صداها

بكيت .. قالوا : سكرت دونه ابواب

.................... قالوا : توفى واندفن في حشاها

يا من يجيب العلم لوكان كذاب

.................... يقول لي عايش وياطا ثراها

والله لهدي له حياتي بلا سباب

.................... تفداه روح(ن) حبه اللي براها

قالوا : توفى .. وقلت : والله ما غاب

.................... لو غاب جسمه باقي(ن) في حناها

احلام طارت في ذرى نعقة غراب

.................... جانا الخبر واظلم علينا فضاها

ضاقت بنا الدنيا وصارت مثل غاب

.................... واستاحشة كل المحانيا معاها

ابكي وقلبي منهم اليوم مرتاب

.................... اقنب قنيب الذيب بخلا خلاها

فرقاه نار(ن) تلهب القلب إلهاب

.................... تشوي حنايا الجوف وتصلا صلاها

يا الله يا المعبود يا فاتح الباب

.................... تسمع دعاء منهو بكى في خفاها

تجعل عليه القبر روضه من عشاب

.................... وتغفر له الزلات واللي وراها

وتنجي ابوي من الغثى يوم الحساب

.................... يسكن في جنة خلد محد(ن) وطاها

وتجعل له من الحور سبعين اتراب

.................... وتنجيه من نار(ن) تلضا لضاها

يا الله تجمعنا بهم جمع الاحباب

.................... في جنة الفردوس باعلا علاها