الظاهرات تهون دون الخوافي ..!

ماتلغي همومي كثير الطواريق /

                      كتبت لين اتعبت درب القوافي

الضيق لو نحكيه يبقى بنا ضيق  /

                     الظاهرات تهون دون الخوافي

اواهـ من هم سكن فالمعاليق /

                       هم قديم ويجرح ومايشافي

اذكره لامني رقيت الشواهيق /

                      على همومي صار عندي اضافي 

يوم الحياة ارزاق ,حظ , وتوافيق /

                      بعض البشر حظه مع الناس غافي

ياحظي اللي مره تغيب وتويق /

                           تعال عندي ياعساك متعافي 

لي طبع يفرق عن طبوع المخاليق /

                            نفسي عن الشكوى يجيها عيافي

وشلون تشكي بنت شيخ المطاليق !/

                           في ذمتي ليصير قبري لحافي 

انام في همي وبضحكة افيق /

                             والحمد لله ماشكينا خلافي

الضيق لو نشكيه يبقى بنا ضيق /

                         والظاهرات تهون دون الخوافي