جـمّـع و فــرّق

من منطلق جمّع عرب لا تفرّق

                   ابجمع حروف ونقاط القصيده

ماني مغرّب بالعلوم ومشرّق

                  والرجل علمه في زمانه يفيده

لأحداث ديرتنا لزوم انتطرّق

                  والدار شعبه بالمواقف رصيده

كم محجرٍ دمعه لخدّيه غرّق

                  والقلب كثر الحسد يقطع وريده

الناس سدّت دينها بالتورّق

                  فكرة سدد لكن ماهي سديده

الوضع مزري والسوالف تأرّق

                  في شاشة التلفاز والا الجريده

من عاش في وقته ماغير ايتدرّق

                  ادنى محابيل الليالي تصيده

جمر الجهل يكوي الكبود ويحرّق

                  ينشر بلاه اورام ماهي حميده

لابوك يالوجه الذي مايعرّق

                  يحمل حطب غيره وحبله بجيده

يشبّها بين العرب وايتسرّق

                  ماهو بلاقي رجل يلعن كديده

نوبٍ يبيع اجواز نوبٍ مفرّق

                  احدٍ ينقص منه واحدٍ يزيده

ضعنا مابين اسمع وعاين ومرّق

                  نكعم فريد ونبتلش في فريده

بين ازدواجيه ودبّل وشرّق

                  صارت حديده ناشبه في حديده

اللي جمع بين الحساء والمحرّق

                  الجسر والا المصلحه والعقيده

من يكسر الغصن الجميل المورّق

                  عسى بنحره يجعل الله كيده