كثر المآسي

الحزن  يكبر    و المصايب  تجدد

  ........  يالله دخيلك نرتجي منك العون

يا قلها  افراحي  ومسرع  تبدد

  ........  كثر المآسي ضيقت  فيني الكون

الدين دين  ولازم  انه  يسدد

  ........  احذر تلاقي خالقك وانت مديون

ضاع الامان ولا بقى من يندد

 ........ من فعل جاهل يقتدي نهج صهيون

ظالم ويحسب قوته بالتهدد

 ........  يطلب رضى شعبٍ من سنين مغبون

طـــالع  بعينك  للأوادم    تمدد

  ........  في كل ركن شيوخ واطفال ينعون

ترى السكينة مكسب الي تودد

  ........  ولي بغو لنصاف للموت   يدنون

في الشام ولا باليمن لا تعدد

  ........  بغداد في همه من اعوام مدفون

عن نشرة الاخبار قمت اتصدد

  ........  ودي اكذب  حالنا  ماهي بدون

ما عاد همي من ظروفٍ تشدد

  ........  مادامت  الارواح  والعـرض  مهيون

نحتار من كثر المصايب نحدد

  ........  وين الوجع  واركان هالروح يثوون

مامن سلاح الا حروفٍ تردد

  ........  تعزي الميت , ونبكي , ويشكون