وش بقالي من جديد !

وش جديدي ؟
هذا .. انا .. من عدة أعوامٍ وأمسي .. هو جديدي ..!
كن هاللحظات فيني وقفت
كن هالدنيا بعذابي ما كتفت
ملت احلامي انتظاري واختفت
وش جديدي ؟
ادفن افراحي ووأدها بأيدي !..
ضحكتي ترعب سكوني
انكساري في عيوني
وحدي .. وحدي .. بين احزاني وظنوني
وش جديدي ؟
ووش بقالي من جديد !
قلبي المرهق بأحاسيسه بليد
جسم متعب يهلكه فكري العنيد
وش جديدي ؟
غير اني في صراع
عالمي غبه ضياع
يسكنه همي وخوفي
ولا نويت اكمل الخطوة خذلني قصر شوفي
وامضي وحدي .. فوق كتفي حزمة اوجاعي وجروحي
وتنتثر رزمة سنين .. وتذرف عيون السحاب تبل روحي
وتثمر ورود الحنين .. ويرتوي من شهدها عصفور بوحي
ويفرد الجنحان ينثر .. اغنيات الحزن ينشر
لين متلاشى صداه .. غاب وابعد في مداه
ما حفظ اخر حروفي .. وارتمي بأحضان خوفي
بين كان وكان يغفى عمر ما يعرف جديد
هذا هو اخر جديدي .. ما بقالي من جديد