قالوا .. بدو

قالوا بدو قلت الأوادم بسيطين  

...............   ما همهم بالتقنية والحضارة

عاشوا بخيام وطوروها الي طين  

...............  ولا تغير نهجهم عن مساره

قالو تخلف .. قلت يا زين يا زين  

...............   ما زيفوا الادوار خلف الستارة

متكاتفين بحلو الأيام والشين  

...............   كلن حمى بيته وعرضه وجاره

هذا التطور وش جنينا الى الحين  

...............  غير الضياع ومكسبٍ بالخسارة

في عيشةٍ ضنكا نمثل سعيدين  

...............  اغراب لو كلن تربع دياره

قابض على الجمرات متمسك الدين  

...............  مهما يجاهد كل شي استثاره

نمضي ولا ندري خُطانا الى وين  

...............   حنا يمين الدرب ولا يساره

هم الفقير اصبح شوية عناوين  

...............   ما زفت بضيق الليالي بشاره

ولا اليتيم ونظرةٍ ما بها لين  

...............  كن الامر فعله وكان اختياره

شفنا القساوة كيف تجتاح وتبين  

...............  مثل السمك يأكل صغاره كباره

ليت الزمن يرجع ورا كان راضين  

...............   ينقال بدو ولا عرفنا حضارة